Legjenda e Arsenal-it, Arsene Wenger ka pohuar se e di mesazhin që Harry Kane po përpiqej të përcillte në intervistën e tij të fundit.
Ylli i Spurs, 29 vjeç, kohët e fundit la të kuptohej se mund të qëndronte në Londrën e Veriut përtej verës, ndërsa diskutoi kthimin në standardet e epokës së Mauricio Pochettino.
Kane ka një vit të mbetur në kontratën e tij me Tottenhamin, por është lidhur shumë me një kalim te Manchester United në fund të sezonit.
Kjo vjen pasi Spurs do të humbasin kualifikimin në Champions League – më pak se dy muaj pasi shkarkimi i Antonio Conte e la klubin në rrëmujë.
Tani Wenger, një trajner ikonë i rivalëve të mëdhenj të Tottenham-it, Arsenal-i, ka thënë fjalën e tij për të ardhmen e kapitenit të Anglisë. Ai beson se qëllimi i komenteve të tij më të fundit ishte të drejtonte gishtin nga standardi i dobët në skuadër.
Duke folur për beIN Sports, francezi tha: “E përkthyer do të thotë që jo të gjithë japin maksimumin gjatë stërvitjes për të qenë mjaftueshëm të mirë në ndeshje.
“A është për shkak të karakterit të lojtarëve apo i gjithë atmosferës brenda fushës stërvitore apo trajnerëve? Nuk e di. Duhet të punosh çdo ditë me lojtarët për të ditur se çfarë po ndodh në të vërtetë, çfarë funksionon dhe çfarë nuk funksionon.
“Duhet të krijohet një kulturë brenda klubit që lejon lojtarët të japin më të mirën. Duhen rregulla të qarta që të gjithë të shohin se çfarë tolerohet dhe çfarë nuk tolerohet. Kur flitet për vlerat, në shumicën e rasteve bëhet fjalë për atë që nuk tolerohet.
“Lojtarët si Harry Kane kanë standarde të larta. Ai tani është i zhgënjyer sepse për vite me radhë skuadra ishte në rrugën e ngritjes. Që prej dy apo tre vitesh ata duket se kanë dështuar përsëri”.
Wenger gjithashtu arriti në përfundimin se Kane do të largohet pas 12 muajsh kur i skadon kontrata. Ai shtoi: “Nëse je menaxheri i tij, Harry Kane ka edhe një vit në kontratë dhe më pas është plotësisht i lirë, çfarë i thua?
“Jepi klubit një shans të fundit dhe pastaj largohu. Nuk ka të bëjë me paratë, por, në fund, gjithmonë ka të bëjë me paratë. Ai nuk do të shitet për më pak se 80 milionë sterlina. Nuk gjen sulmues të kësaj cilësie”.
Pavarësisht se është ende në kërkim të trofeut të parë të karrierës së tij, Kane është golashënuesi rekord i të gjitha kohërave të Tottenham-it dhe Anglisë.
Goli që i dha fitoren skuadrës kundër Crystal Palace të shtunën e ngjiti atë në vendin e dytë në listën e golashënuesve më të mirë të të gjitha kohërave në Premier League me 209 gola.
