ZYRTARE. Shqipëria e zëvendëson Rusinë e përjashtuar me këtë ndeshje miqësore

19 Maj 2022
12:29
Alfred Lleshi
back button

Konfirmimi ka ardhur nga fqaja zyrtare e FSHF-së. Kombëtaja jonë kuqezi, e drejtuar nga Edy Reja, do të luajë më 13 qershor ndaj Estonisë në “Arena Kombëtare”. Pra, dita e planifikuar për të zhvilluar kualifikuesen e Ligës së Kombeve ndaj Rusisë, nuk do të mbetet bosh. Sfida zyrtare, që ra poshtë me përjashtimin e Rusisë nga të gjitha garat ndërkombëtare (pas pushtimit të Ukrainës), do të kompensohet nga miqësorja me një vend balltik:

“Kombëtarja shqiptare do të luajë një miqësore me Estoninë. Federata Shqiptare e Futbollit ka arritur akordin me Federatën Estoneze që kjo ndeshje të luhet më 13 qershor 2022 në stadiumin “Air Albania” të Tiranës, duke nisur nga ora 18:00.

Në këtë datë ishte planifikuar më parë që Shqipëria të luante ndaj Rusisë në Ligën B të Nations League, por pas vendimit të UEFA për pezullimin e Rusisë, FSHF vendosi që të shfrytëzonte këtë datë zyrtare për të organizuar një miqësore.

Po në qershor Shqipëria do të luajë më 6 qershor me Islandën në transfertë dhe më 19 qershor me Izraelin në shtëpi, që të dyja sfida të vlefshme për Nation League.
Kjo do të jetë hera e katërt që Shqipëria dhe Estonia do të përballen në një ndeshje futbolli. Në të kaluarën të dy përfaqësueset janë ndeshur tre herë me njëra-tjetrën, në të tre rastet për ndeshje miqësore.
Sfida e parë Shqipëri-Estoni është luajtur më 15 nëntor 2003 në Tiranë dhe u fitua nga kuqezinjtë me rezultatin 2-0. Golat u shënuan nga Adrian Aliaj dhe Alban Bushi. Përballja e dytë është ajo e 28 prillit e luajtur në Talin të Estonisë dhe përfundoi në barazim 1-1.

Goli për Shqipërinë u shënua nga Adrian Aliaj. Ndërsa sfida e tretë Estoni-Shqipëri është zhvilluar më 14 nëntor 2009 dhe ka përfunduar në barazim 0-0. Edhe kjo miqësore u luajt po në Talin”.

Lajme të tjera

Lajmet e fundit