Tirana ka humbur një nga beniaminët e ekipit, pasi Dorian Kërçiku i ka dhënë lamtumirën bardhebluve. Mbrojtësi i krahut të djathtë ka lajmëruar përmes Instagramit të tij se aventura me Tiranën ka marrë fund. 26-vjeçari nuk largohet me polemika, por vetëm me falenderime për presidentin dhe pjesën tjetër të skuadrës.
“Përshëndetje, nga sot nuk do të jem më pjesë e Kf Tiranës, ishte dëshira ime që të largohem. Kam kaluar gjashtë vite e gjysmë me Tiranën. Falenderoj presidentin Refik Halilin, gjithë stafet dhe lojtarët që kam punuar gjatë këtyre viteve“, – shkruan lojtari.
Kërçiku nuk gjeti shumë hapësira këtë sezon, pasi ka luajtur vetëm 4 ndeshje. Ai është preferuar vetëm 2 ndeshje si titullar. Karriera e tij duket se do të jetë larg Superiore dhe do të provojë emocionet e kampionatit kosovar.
