FIFA i ka hequr pezullimin sulmuesit të Shteteve të Bashkuara, Folarin Balogun, që do të thotë se ai do të luajë në ndeshjen e raundit të 16-të të Kupës së Botës kundër Belgjikës. Trump shfrytëzoi rastin për të duartrokitur vendimin e mikut të tij Infantino, por edhe Federata Belge e Futbollit lëshoi një deklaratë të ashpër.
“Federata Mbretërore Belge e Futbollit (RBFA) është e tronditur nga vendimi i FIFA-s për të shpallur lojtarin e pezulluar më parë të Shteteve të Bashkuara, Folarin Balogun, të aftë për të luajtur në ndeshjen SHBA-Belgjikë. FIFA e bazon vendimin e saj në Nenin 27 të Kodit Disiplinor të FIFA-s”, thuhet në deklaratë.
Më tej, ajo vijon: “Kjo dispozitë thotë se Komiteti Disiplinor i FIFA-s mund të vendosë të pezullojë ekzekutimin e një sanksioni disiplinor të vendosur më parë. Megjithatë, Neni 66.4 i të njëjtit Kod Disiplinor të FIFA-s thotë qartë se një karton i kuq automatikisht sjell një pezullim për ndeshjen e ardhshme të ekipit, siç ka qenë rasti për të gjitha kartonat e kuq të mëparshëm të treguar gjatë këtij Kupe Bote FIFA”.
“Vendimi është në konflikt të drejtpërdrejtë me dispozitat e Rregullores së Garave të Kupës së Botës FIFA. Siç thuhet në Nenin 10.5: ‘Nëse një lojtar ose zyrtar i ekipit përjashtohet pas një kartoni të kuq ai do të pezullohet automatikisht për ndeshjen e radhës të ekipit të tij. Përveç kësaj, mund të vendosen sanksione të mëtejshme”, shton deklarata.
“Natyra automatike e këtij pezullimi u përsërit gjithashtu në mënyrë të qartë në Qarkoren nr. 16 të Kupës së Botës FIFA 2026, e shpërndarë të gjitha shoqatave anëtare pjesëmarrëse më 12 maj 2026. I njëjti rregull përsëritet në çdo takim koordinues të ndeshjeve të Kupës së Botës FIFA 2026 para çdo ndeshjeje dhe përfshihet në të gjitha prezantimet e seminareve të Kupës së Botës FIFA 2026”, thuhet më tej.
“Për të mbrojtur të drejtat legjitime të të gjitha ekipeve pjesëmarrëse dhe për të mbrojtur parimet themelore të lojës së ndershme në sportin tonë, si në këtë Kupë Bote FIFA ashtu edhe në edicionet e ardhshme të turneut, RBFA po vlerëson të gjitha opsionet e mundshme”, përfundon deklarata.
Federata Belge e Futbollit nuk po dorëzohet dhe ka paraqitur një apel kundër pezullimit të pezullimit të Balogun. Si Belgjika ashtu edhe Shoqata e Futbollit e Shteteve të Bashkuara do të duhet të paraqesin mbrojtjet e tyre te një anëtar i pavarur i Komitetit të Apelimit, i cili mund të vendosë para ndeshjes, megjithëse FIFA nuk ka dhënë asnjë garanci se kur.
Është gjithashtu e paqartë nëse apelimi është thjesht një hap procedural apo nëse mund të çojë në një ndryshim të ri qëndrimi. Ndërkohë, Belgjika ka kërkuar arsyet e vendimit dhe raportin nga organi i arbitrazhit të FIFA-s.
