Pas kualifikimit të Francës dhe Spanjës, radha iu vjen Norvegjisë dhe Anglisë, të cilat sonte do të përballen në “Hard Rock Stadium” të Miami për një vend në gjysmëfinalet e Kupës së Botës 2026.
Skandinavët vijnë në këtë sfidë pasi eliminuan Brazilin, ndërsa “Tre Luanët” lanë jashtë Meksikën. Fituesi i këtij dueli do të përballet në gjysmëfinale me fituesin e ndeshjes Argjentinë–Zvicër.
Vëmendja më e madhe është te përballja mes dy prej sulmuesve më të mirë në botë: Erling Haaland dhe Harry Kane. Njëri përfaqëson brezin e ri të goleadorëve, tjetri përvojën dhe instinktin e një “numri 9” klasik. Një duel që mund të ndezë edhe debatin: kush është sulmuesi më i mirë në botë?
Norvegjia e drejtuar nga Ståle Solbakken ka shkruar tashmë historinë duke mbërritur për herë të parë në çerekfinale, por nuk dëshiron të ndalet këtu. Përveç Haaland, skuadra mbështetet te paraqitjet e portierit Ørjan Nyland, mesfushorit Sander Berge, si edhe te Alexander Sørloth e talenti Antonio Nusa, duke dëshmuar se është një ekip i ndërtuar me durim dhe cilësi.
Nga ana tjetër, Anglia e Thomas Tuchel mbetet një nga favoritët për ta fituar Botërorin. Me emra si Declan Rice, Jude Bellingham, Bukayo Saka, Anthony Gordon dhe kapitenin Harry Kane, anglezët kanë talent dhe besim se mund ta çojnë trofeun në shtëpi.
Atmosfera në Miami pritet të jetë elektrizuese, me tifozët norvegjezë që do të sjellin në stadium “Viking Row”, ndërsa anglezët do të këndojnë himnin e tyre të famshëm “Wonderwall”.
Norvegjia pritet të zbresë pothuajse me të njëjtin formacion që mposhti Brazilin, me balotazhin e vetëm mes Sørloth dhe Schjelderup në krahun e djathtë të sulmit. Ndërkohë, Anglia do të vuajë mungesën e Jarell Quansah, i pezulluar pas kartonit të kuq ndaj Meksikës, me Ezri Konsa, John Stones dhe Marc Guéhi që pritet të formojnë repartin defensiv.
Ndeshja nis në orën 23:00 (me orën europiane) dhe do të gjykohet nga arbitri francez Clément Turpin. Fituesi do të sigurojë një vend në gjysmëfinalen e 15 korrikut në Atlanta, ku e pret fituesi i sfidës Argjentinë–Zvicër.
