Ai hyri në lojë në minutën e 61-të, me ndeshjen e bllokuar në rezultatin 0-0, dhe shënoi golin e fitores në minutën e 87-të. Joshua Zirkzee është lojtari i ndeshjes së tij të parë në Premier League, me Manchester United, me të cilin mposhti Fulhamin të premten në mbrëmje.

Në fund të ndeshjes, ish-lojtari i Bologna foli për BBC: “Debutim perfekt, apo jo? Sigurisht, nuk mund të kishte shkuar më mirë sonte. Gjithçka ka qenë shumë mirë këtu, që kur mbërrita te Manchester United.

Grupi më priti në mënyrë fantastike, ndihem shumë rehat, si në shtëpinë time. Këtu po kënaqem shumë, ndodhem në një klub të madh. Ne punojmë shumë çdo ditë dhe fokusohemi në atë që duam të arrijmë. Unë nuk ndiej ndonjë presion për momentin, jam i lumtur që luaj këtu dhe punoj me stafin.

Të gjithë kanë qenë fantastikë, padyshim që kam nderin të punoj ngushtë në dikë si Ruud Van Nistlerooy. Një ish-sulmues i shquar, që po më ndihmon shumë. Iu jam mirënjohës të gjithëve, sepse kanë qenë të mrekullueshëm, është kënaqësi të jem këtu”.