Futbollisti gjithmonë kontrovers, por edhe brilant e karizmatik, i cili ishte një mit në futbollin anglez në vitet 1990, është rishfaqur në një gazetë britanike. Këtë herë për të dhënë vizionin e tij të veçantë mbi atë që po ndodh në Premier League, në veçanti, si dhe futbollin europian, në përgjithësi, në një intervistë për “Sportscasting UK”.

Fillimisht ka dashur të bëjë të qartë qëndrimin e tij për atë që po ndodh te Manchester United, ku duket se, sipas Paul Gascoigne, disa lojtarë tallen me Erik Ten Hag: “Unë mendoj se atje janë disa lojtarë që nuk e kuptojnë se për kë po luajnë. Më vjen pak keq për Ten Hag. Do të doja që Ferguson ta merrte drejtimin e skuadrës vetëm për një sezon dhe të shihja se çfarë mund të bëjë me ata lojtarë”.

Paul Gascoigne, duke folur për ngjarjet aktuale, ndërthuri anekdota nga koha e tij: “Do të ishte mirë që Rashford të shkonte në Itali, kjo do ta shkundte. Më tronditi edhe mua, kur firmosa për Lazion. I thashë babait: Do të shkojmë t’i shohim një javë në stërvitje para se të firmosim kontratën. E pashë Lazion duke u stërvitur dhe mendova: Çfarë sesioni i mrekullueshëm stërvitor”.

Ish-futbollisti legjendar siguroi se është argëtuar nga rivaliteti që ekziston sot mes Arsenalit dhe Manchester City. Megjithatë, pranoi që potenciali i vërtetë i Premier League është se nuk mund të përqendroheni vetëm në një ekip, sepse ka të tjerë të mirë që mund t’ju befasojnë kur nuk e prisni.

Gascoigne siguron se vazhdon ta shikojë Pep Guardiolën si trajner të kombëtares së Anglisë dhe se ekipi i tij i preferuar, të cilin e shikonte çdo javë, ishte Barça e MSN, në të cilën Messi, Luis Suarez dhe Neymar ishin kampionë: “Thjesht nuk mund t’ua hiqje topin atyre. Ata ishin të tmerrshëm”.

Ai sugjeron se Trent Alexander-Arnold mund të ndjekë hapat e Jude Bellingham dhe të shkojë te Real Madridi: “Padyshim mund të përshtatet pa probleme te Real Madridi. Sot nuk është aq e komplikuar të shohësh një anglez larg Premier League. Kur shkova te Lazio, isha vetëm unë”.