Në një natë tjetër ëndrrash për Leo Messin, i cili shënoi “hat-trick” kundër Bolivisë, kishte vend edhe për “përrallën” e Nico Paz. Lojtari i talentuar i Como, i thirrur për herë të parë nga Scaloni, debutoi me Argjentinën. Por jo vetëm kaq. Nico Paz ka qenë menjëherë protagonist në fushë, duke marrë duartrokitje nga tifozët, trajneri dhe shokët e skuadrës. Përfshirë atë vetë: Lionel Messin.
Nico Paz u hodh në fushë në minutën e 73-të të Argjentinë-Bolivi, me rezultatin 4-0 për Albiceleste, duke zëvendësuar Lautaro Martinez. Lojtarit të talentuar të Como iu nevojitën vetëm pak minuta për t’i dhënë Messit asistin e 6-0 final.
Mjaft për t’i bindur të gjithë se debutimi i Nico Paz me Argjentinën nuk ishte sa për “shëtitje”, por fillimi i një historie më të madhe. Nico Paz, në fund të ndeshjes e komentoi atë që ndodhi pa i kursyer fjalët: “Ishte një nga ditët më të mira të jetës sime, përmbusha një ëndërr. Nuk e besoja se çfarë po ndodhte”.
Thirrja e tij në kombëtare erdhi gjithashtu duke përfituar nga momenti i vështirë i përjetuar nga një tjetër talent argjentinas, që luan në Itali, si Matias Soulé. Siç u përmend, edhe një herë, protagonist i madh në fitoren e Argjentinës ishte Messi i zakonshëm, i cili shënoi “hat-trick”.
Në fund të ndeshjes ndaj Bolivisë, numri 10 i Albiceleste kishte fjalë shumë të rëndësishme për Nico Paz: “Përveç moshës së tij, ai ka zgjuarsi mbresëlënëse si futbollist. E kupton lojën në mënyrë perfekte. Shpresoj që të vazhdojë kështu, duke u rritur”.