Prej dekadash tashmë ‘vjedhja’ e talenteve të rinj është një nga çështjet që shkakton tensione të mëdha mes klubeve të mëdha evropiane. Sipas The Athletic, drejtuesit e akademisë së Chelseat kanë refuzuar kërkesat për akreditim nga skautët e Liverpool dhe Manchester United javët e fundit, duke ngritur shqetësime rreth tensioneve mes disa prej akademive më të larta të Anglisë.

Reds nga ana e tyre akuzuan Chelsean si klubi i parë që vendosi kufizime të tilla, por klubi londinez mohoi çdo akuzë. Liverpool tha gjithashtu se asnjë vëzhgues i Chelseat nuk ishte penguar të ndjekë ndeshjet në Merseyside. Ata paralajmëruan se nëse skautët e bluve aplikojnë për akses në të ardhmen, aplikimet e tyre do të refuzohen si një formë hakmarrjeje.

Sipas faqes, tensionet mes klubeve i kanë rrënjët në ‘vjedhjen’ e Liverpool-it të yllit 16-vjeçar Rio Ngumoha. Ai u konsiderua gjerësisht si një nga lojtarët më premtues që doli nga akademia e Chelsea në vitet e fundit dhe pas ardhjes së tij në Anfield, pati një zhgënjim të madh në Cobham, pavarësisht se transferimi erdhi pas një procesi rigoroz të rishikimit me pesë faza të krijuar nga Premier League.

Rregulloret e zhvillimit të të rinjve kërkojnë që klubet t’u lënë hapësirë ​​vëzhguesve që të ndjekin ndeshjet e akademisë nëse ata kanë marrë njoftim paraprak, të paktën 24 orë përpara, dhe nëse vëzhguesi ka identifikim të vlefshëm.