“Rafa ka talent. Ai është lojtari më i mirë në ekip, thjesht duhet të vazhdojë të bëjë atë që po bën. Është vetëm një fazë ngërçi dhe, shpesh, është e tillë për lojtarët sulmues. Një gol i madh ose i lehtë do t’i mjaftojë që ta gjejë sërish besimin”.

Në periudhën ndoshta më të errët të përjetuar te Milani nga Leao, i cili përfundoi në stol në të gjitha ndeshjet e fundit të kampionatit, Alvaro Morata flet si lider dhe përpiqet ta shkundë portugezin. E bëri këtë përmes një interviste të gjatë me “The Athletic”: “Nuk është e lehtë. E gjithë kjo që bën Rafa është e rëndësishme për ne, kemi nevojë për të”.

Në prag të misionit thuasje të pamundur në “Bernabeu”, kundër Real Madridit, sulmuesi spanjoll foli edhe për Ligën e Kampionëve: “Nëse Milani mund të bëhet sërish konkurrues për ta fituar, si në të kaluarën? Në futboll nuk i dihet kurrë.

Sezonin e kaluar Borussia Dortmund nuk po shkonte mirë në Bundesligë, apo në përgjithësi, por arriti finalen e Champions League. Kush e di si do kishte përfunduar nëse goditja e Fullkrug do të kishte hyrë brenda dhe nuk do të kishte goditur shtyllën. Ndoshta Borussia Dortmund do të ishte kampione e Europës. Çdo edicion i Champions League evidenton skuadra që askush nuk i pret”.

A kanë Milani dhe Real Madridi të njëjtën atmosferë? Ja si përgjigjet Morata: “Është pikërisht kështu. Para se të vija te Milani, të gjithë më thanë se ajri që thith këtu është i ndryshëm. Ju vështroni përreth në Milanello dhe shihni të gjithë lojtarët që kanë fituar trofe me Milanin. Për mua, Milani ka pasur gjithmonë një rol të rëndësishëm në historinë e futbollit”.

Më tej, mbi kthimin e tij në “Bernabeu” shtoi: “Nuk mendoj se gjërat kanë ndryshuar shumë. Jam i vetëdijshëm për këtë, ndaj pres që të vërshëllehem e shahem atje si kundërshtar. Janë gjëra normale”.