Pak para ndeshjes kundër Lazios, e fundit në “San Siro” për zilatrit në këtë sezon, Beppe Marotta foli për “Dazn”, duke u ndalur edhe te çështja delikate e korporatës, e cila në 48 orët e ardhshme do të arrijë një përkufizim që mund të shohë ndryshimin mes “Suning” dhe “Oaktree” në kontrollin e klubit:

“Zhang? Çështja ka të bëjë me aksionerët. Mund të garantoj vetëm se klubi i Interit është shumë solid, nuk kemi absolutisht asnjë lloj problemi. Familja ‘Zhang’ e do Interin dhe çdo vendim që do të marrë do ta bëjë me shumë dashuri për klubin dhe tifozët. Jam shumë optimist se mund të vazhdojmë kështu. Ne jemi një klub i konsoliduar nga pikëpamja financiare.

Stabiliteti i klubit garantohet absolutisht nga prania e Zhang, – përsëriti Marotta. – Folëm me të edhe sot në mëngjes, ishte shumë i kënaqur me këtë festë. Zhang na jep siguri, pavarësisht se çfarë thonë njerëzit, që na urrejnë. Ata që na mbështesin e dinë. Ne jemi një shoqëri e virtytshme dhe sfidoj këdo që mendon të kundërtën. Llogaritë financiare nuk na shqetësojnë, presidenti ka treguar me veprimet e tij se e do fort Interin”.

Thënë këtë, disa fjalë edhe nga këndvështrimi i tregut: “Merkatoja duhet të përbëhet nga kreativiteti dhe kompetenca, por mbi të gjitha duhet përdorur leva e guximit, duke u fokusuar te lojtarët e rinj dhe me përvojë. Kemi pasur balanca pozitive në treg. Megjithatë, kemi krijuar gjithmonë ekip konkurrues vitin pasardhës. Ndryshimi i 12 lojtarëve verën e kaluar dhe fitimi i titullit dëshmon karakteristikat tona kryesore në merkato”.