Gianfelice Facchetti, djali i legjendës së Interit, Giacinto, i cili mbante edhe postin e presidentit të zikaltërve, ka dhënë një intervistë për “Gazzetta dello Sport”, duke folur për rolin e ri të Giuseppe Marotta: “Besoj se fokusimi tek ai ishte zgjedhja perfekte. Një figurë karizmatike si në fushën e lojës, ashtu edhe në nivel diplomatik.

Së bashku me bashkëpunëtorët e tij të ndryshëm, ai i lejoi tifozët të mos ndjenin vështirësitë e lidhura me problemet e Suning, duke e mbajtur Interin në krye, pavarësisht mbylljes së ‘çezmave kineze’. Babai im, një mik i madh i pronarit të atëhershëm Ruggeri, tha se ai menaxher i ri do të bënte karrierë, më duket se kanë tipare të përbashkëta mes tyre”.

Megjithatë, Marotta ende mbahet mend për të kaluarën e tij te Juventusi…
Sigurisht, prejardhja e secilit është e ndryshme, por unë besoj se Marotta është zhytur në mënyrë të përsosur në realitetin e Interit, duke kapur me kalimin e viteve tiparin dallues dhe pasionin unik të tifozëve. Ai është modeli i parë dhe i vërtetë i ndjenjës së përkatësisë zikaltër.

Fryma e përkatësisë mund të ndihet edhe në rinovimet e Lautaro dhe Barella…
Kur flasim për pagat e lojtarëve, duhet të kujtojmë gjithmonë se ata janë në një botë të ndarë. Zgjatjet e marrëveshjeve të këtyre lojtarëve kyç është një tjetër sinjal i rëndësishëm për të ardhmen, konfirmimi i asaj që pamë në fushë gjatë kampionatit triumfues.