Ashtu sikurse patën premtuar, Manchester City pritet të paraqitet në Botërorin e klubeve me një fytyrë krejt ndryshe. Pasi siguroi Tijjani Reijnders nga Milani dhe algjerianin Rayan Aït-Nouri nga Wolves, “citizens” janë pranë mbylljes së marrëveshjes së tretë.

Bëhet fjalë për Rayan Cherki, i cili debutoi me kombëtaren franceze, duke shënuar një gol dhe një asist kundër Spanjës. Lojtari i Lyon do ta mbyllë javën e tij të pabesueshme duke u transferuar në ekipin e Pep Guardiola. Dhe të mendosh që jemi vetëm në qershor.

Një marrëveshje me vlerë 40 milionë euro, përfshirë bonuset. Rayan Cherki do të nënshkruajë një kontratë pesëvjeçare (deri në vitin 2030) dhe do t’i bashkohet menjëherë bashkëlojtarëve të rinj përpara Kupës së Botës për klube.

Cherki po vjen nga një sezon fantastik, në të cilin shënoi 12 gola dhe dha 20 asistime në 44 ndeshje në të gjitha garat për Lyon. Edhe pse ai e zgjati kontratën me klubin francez në mars, kushti ishte që ai të lejohej të largohej nëse do të vinte një ofertë e rëndësishme.