Samuele Ricci është pjesë e kuqezinjve, Luka Modrić gjithashtu. Prej kohësh Milani ka identifikuar përforcimin e tretë për të kompletuar mesfushën: Ardon Jashari, mesfushori i Club Brugge.
“Telenovela” ka zgjatur prej disa kohësh, por kapitulli i fundit duket se po afrohet. Ose ndoshta ka ardhur tashmë, duke gjykuar nga deklaratat e trajnerit të belgëve, Nicky Hayen, pas fitores në Superkupën e Belgjikës ndaj Union Saint-Gilloise.
Fjalë që hedhin dritë mbi operacionin “Jashari-Milan” dhe sugjerojnë se marrëveshja është shumë e afërt. Dhe ndoshta, gati për të marrë miratimin përfundimtar.
Hayen, në konferencën për shtyp pas ndeshjes, fillimisht deklaroi se nuk donte të përfshihej në çështjet e merkatos dhe donte të fliste vetëm për ndeshjen: “Nuk do të komentoj mbi këtë çështje”.
Më pas, megjithatë, ndryshoi qëndrim dhe vendosi të fliste për rastin Jashari. Ai komentoi edhe sjelljen e lojtarit, i cili nuk mori pjesë në fazën përgatitore në Angli dhe mungoi në festën e fillimit të sezonit me tifozët, si dhe në foton zyrtare të skuadrës me bashkëlojtarët: “Unë nuk do të kisha reaguar në atë mënyrë. Nëse ke një kontratë, atëherë përpiqu ta respektosh deri në ditën e fundit”.
Më tej, vetë Hayen dha një të dhënë të rëndësishme, që sugjeron se marrëveshja është afër arritjes. Ai foli për një akord, si mes Jasharit dhe Milanit, ashtu edhe mes dy klubeve: “Ka një marrëveshje mes Ardonit dhe klubeve. Do të shohim sa do të zgjasë kjo. Unë mbështes klubin 100%. Ky është një shembull i mirë për të treguar si t’i menaxhosh lojtarët më të mirë. Shpresoj të arrihet shpejt një marrëveshje, cilado qoftë ajo”.
OFERTA E MILANIT
Milani dhe Club Brugge kanë qenë shumë afër prej ditësh. Kuqezinjtë kanë ofruar 32.5 milionë euro si pagesë fikse, plus 2.5 milionë euro bonuse të lehta dhe 3 milionë të tjera të lidhura me objektiva më të vështirë, për një total prej 38 milionë eurosh.
Kërkesa e Brugge ka qenë gjithmonë pak më e lartë: 35 milionë euro si bazë fikse dhe 5 milionë bonuse, rreth 40 milionë në total. Në thelb, ndarja mes ofertës dhe kërkesës ishte pak miliona, edhe pse struktura e pagesës dhe bonuset ishin të ndryshme. Por tani fjalët e Hayen sugjerojnë se Jashari është fare pranë kalimit te Milani.
Jashari do t’i rikthehet stërvitjes me ekipin, pasi mungoi në ndeshjen kundër Union Saint-Gilloise. Ai është në pritje të dritës jeshile për t’u transferuar në Itali, ndoshta për një shumë pak më ndryshe nga ato që përmendeshin më parë.
Sipas “Gazzetta dello Sport”, presioni i Milanit dhe i vetë Jasharit duket se e ka lodhur klubin belg. Nëse Club Brugge më parë iu rezistonte me forcë ofertave, tani e ka ulur më në fund qasjen refuzeuse.
Sërish sipas të njëjtit burim, “investimi përfundimtar do të jetë 30 milionë euro, plus bonuse”. Allegri shpreson ta ketë Jasharin në dispozicion që në turneun që do të zhvillohet këto ditë në rajonin e Azi-Paqësorit.
