Qëndrimi i Bruno Fernandes te Manchester United ishte një lehtësim për Ruben Amorim. Mesfushori portugez mund të ishte larguar nga “Old Trafford” këtë verë por lojtari refuzoi ofertën e papërsëritshme, shumëmilionëshe nga Al-Hilal, duke i dhënë qetësi trajnerit të “djajve të kuq”.

Fernandes shënoi gjithashtu të dy golat në fitoren miqësore 2-1 kundër West Ham, duke konfirmuar rëndësinë e tij. Ruben Amorim përsëriti vendimin e lojtarit në lidhje me të ardhmen e tij: “Bruno ishte shumë i qartë sezonin e kaluar. Ai jep një shembull të mirë, punon shumë, gjithmonë i disponueshëm”.

“Mund ta shihni në asistimet e tij, golat e tij. Jo vetëm kaq. E ndjeva këtë gjë edhe gjatë turneut. Ndjeva se tani ka më shumë lojtarë që mbështesin grupin. Kjo është mirë. Por ai është lideri ynë, kështu që kjo është me të vërtetë e rëndësishme. Jo vetëm në fushë, por edhe jashtë saj“, tha Amorim.

“Ndonjëherë luan edhe me dhimbje. Problemi është se ndonjëherë frustrohet dhe humbet përqendrimin në detyrën e tij. Ndonjëherë dëshiron t’i ndihmojë shokët e ekipit aq shumë sa nuk është gjithmonë gjëja më e mirë për të bërë. Bruno duhet të presë topin në situata të caktuara. Kjo është ajo që bën një lider, por ai ka nevojë për ndihmë. Dhe ai do të marrë ndihmë“, tha Amorim.