Për momentin nuk ka divorc mes Alice Campello dhe Alvaro Morata. Influencuesja italiane e bëri këtë të ditur për revistën spanjolle “Vanitatis”: “Nuk ka asgjë në tavolinë, ende nuk kemi rënë dakord për asgjë. Nuk jemi me nxitim, kam prioritete të tjera për momentin, të tilla se ku do të jetoj me fëmijët e mi”.

Padyshim që nuk do të jetë një divorc i diskutueshëm, teksa Alice shtoi: “Ne kemi të njëjtët avokatë dhe një marrëdhënie të shkëlqyer.” Campello më pas ndau një deklaratë rrëqethëse: “Unë, për Alvaro Morata do të vrisja njerëz edhe sot”.

Pas ndarjes nga Morata, Alice Campello qëndroi në Madrid për të mos prishur qetësinë e katër fëmijëve të saj, por është gati të kthehet në Itali, ku tashmë ish-bashkëshorti i saj është shpërngulur falë kontratës me Milanin: “Për momentin unë dhe fëmijët e mi jetojmë në Madrid, nuk është e vërtetë që jemi transferuar në vendin tim, megjithëse me siguri do ta bëj së shpejti. Do të zhvendosemi në Milano, afër Alvaro”.

Udhëtimi i fundit që ajo bëri me fëmijët e saj nuk ishte gjë tjetër veçse deri në Venecia për të vizituar gjyshin e fëmijëve, i cili jeton atje: “Lëvizja ime nuk do të jetë e afërt, nuk kam kërkuar ende apartament në Milano. Sidoqoftë, dua që fëmijët e mi ta shohin sa herë të duan, edhe përditë, babanë e tyre”.

Për shkaqet e ndarjes me Morata, influencuesja italiane përsëriti se nuk kishte tradhti nga ana e sulmuesit iberik: “Ne u martuam shumë herët, unë isha vajzë 21-vjeçare, ende e papjekur. Kam pasur depresion pas lindjes së vajzës sime, edhe ai gjithashtu ka kaluar kohë të këqija për shkak të presionit të botës së futbollit. Kohët e fundit nuk ishim mirë me njëri-tjetrin”.

Sipas thashethemeve të fundit, marrëdhënia konfliktuale mes familjes së Alice dhe Morata ka minuar lidhjen e dy ish-bashkëshortëve, së bashku me keqkuptime të tjera dhe dallime të papajtueshme.