Pas një sezoni të gjatë dhe zhgënjyes, që kulmoi me eliminimin e tyre në gjysmëfinalet e Kupës së Botës për klube, yjet e Real Madrid po shijojnë pushimet e tyre verore. Kthimi i tyre në stërvitje është planifikuar për 4 gusht, një datë e zgjedhur nga trajneri i ri Xabi Alonso, i cili do ta përdorë këtë periudhë për të rishikuar skuadrën dhe për të filluar planifikimin për sezonin 2025/26.

Një nga çështjet që duhet zgjidhur ka të bëjë me Eduardo Camavinga, i cili aktualisht është në një gjendje pasigurie. Ai mungoi në Kupën e Botës për shkak të një dëmtimi, ndaj mesfushori francez ende nuk ka një vend të qartë në planet e trajnerit bask.

Siç raportohet nga “Marca”, Alonso ende nuk ka vendosur për pozicionin ose rolin ideal të francezit. Mesfusha e Real Madrid me lojtarë si Valverde, Bellingham, Arda Güler dhe Tchouaméni po i vështirëson gjërat për Camavinga.

Gjetja e një vendi të qëndrueshëm për të në fushë do të jetë një nga sfidat kryesore të trajnerit të ri gjatë kampit stërvitor veror. Ende nuk ka diskutime për një largim, por thashethemet për interes të mundshëm nga Premier League po fitojnë terren. Nëse situata nuk ndryshon në javët e ardhshme, e ardhmja e Camavinga mund të bëhet një nga temat e nxehta të merkatos.