Arsenal nuk përfitoi nga ndalesa i Liverpool në kampionat, duke arritur një barazim pa gola ndaj Everton. “Ndihem shumë i zhgënjyer që nuk e fituam atë ndeshjen sepse, nëse ka një ekip që e meritonte ta fitonte atë takim, ishte Arsenal”.

Është ky komenti i trajnerit i “topçinjve” Mikel Arteta, që pranon se skuadra e tij humbi një mundësi të mirë për të marrë 3 pikët. “Asnjë gjuajtje të pësuar. Dominuam me lojën tonë, nuk i lejuam ata të vraponin, asnjë goditje në portën tonë”, shtoi spanjolli.

“I mbajtëm në gjysmëfushën e tyre dhe krijuam rastet për shënim, por ishim të paqartë në 20 metrat e fundit për të shënuar gola. Ndaj, jam shumë i zhgënjyer nga ky barazim, pasi lamë dy pikë të rëndësishme”, shtoi Arteta.

“Nuk mund të kërkoj më shumë nga djemtë përveç futjes së topit në rrjetë. Kur e dominon një ndeshje duhet ta fitosh atë, por  ky është futboll. Por, sinqerisht, është e vështirë të kërkosh diçka tjetër nga ekipi”, tha Mikel Arteta.

Në fund, trajneri i Arsenal komentoi: “Individualisht mund t’i bëjmë gjërat pak më mirë dhe të ofrojmë më shumë cilësi e qetësi para portës kundërshtare. Gjithsesi, jo gjithnjë është e lehtë, sidomos kur luan kaq shpesh”.