Kupa e Gjermanisë rezervon një sfidë të madhe sot në mbrëmje, atë mes Bayern Muncih dhe Bayer Leverkusen. Dy nga skuadrat më të mira të dy sezoneve të fundit në Gjermani do të përballen mes tyre, në një ndeshje spektakolare.

Trajneri i bavarezëve, Vincent Kompany, konfirmoi se do të luajë pa sulmuesin Harry Kane, i dëmtuar në fundjavë në kampionat: “Është gjithmonë e vështirë të thuhet se sa kohë do të qëndrojë jashtë. Ka mundësi që ai të luajë sërish këtë vit, por e sigurtë është se do të humbasë disa ndeshje”.

“Ai nuk mund të zëvendësohet, është top-lojtar, por ne do ta zgjidhim çështjen ndryshe. Në fushë ndaj Leverkusen nuk do të na mungojë talenti. Kemi opsione që mund të luajnë në atë pozicion”, shtoi Kompany.

“Janë Thomas Muller, Mathys Tel, Gnabry, Michael Olise, Leroy Sane, Jamal Musiala. Këta janë lojtarë që kanë aftësinë për të shënuar gola edhe pse askush prej tyre nuk mund t’i zëvendësojë golat e Harry Kane”, tha trajneri i Bayern.