Kthimi në origjinë, për të arritur një ëndërr. Ky është plani i Gianluigi Buffon. Portieri 43-vjeçar nuk ka ndërmend “t’i varë dorezat në gozhdë”, por rinis përsëri, pasi u kthye te fanella e Parmës. Ai dëshiron të luajë Kupën e Botës së Katarit më 2022 me ekipin kombëtar, 16 vite pas triumfit në Berlin me Italinë e Marcello Lippi. Portieri nga Carrara dha një intervistë për mikrofonët e “La Gazzetta dello Sport”.

“Tani vazhdoj, sepse kam një ëndërr. Por, do të duhet të mbështetem nga rezultatet. Sapo të njoh një shenjë të rënies, një minutë më vonë do të ndalem. Gjithashtu, sepse jam plotësisht i lumtur në shtëpi me gruan dhe fëmijët e mi, me miqtë. Lënia e futbollit kurrë nuk do të jetë problem, sepse ndiej nevojën për të bërë diçka tjetër. Jam i ngazëllyer me idenë se do të jem në gjendje t’iu kushtoj kohë hobeve dhe shumë gjërave të vogla, që po tani po i sakrifikoj. Kam një ëndërr për të arritur, mbase një utopi, e cila më shtyn përpara”, – nënvizoi portieri veteran italian.

Një Kupë Bote për të qenë “gjallë”. Buffon shpjegon se “Katar 2022” përfaqëson një stimul për të: “Mancini bëri një gjë të jashtëzakonshme. Ne vetëm mund ta lëvdojmë dhe ta përgëzojmë atë. Dhe unë, në moshën 43 vjeç, gjithashtu për respekt të punës së trajnerit, nuk do të jem kurrë ai që aplikon: Oh, edhe unë jam këtu… Kurrë. Por më duhet Kupa e Botës për të ëndërruar. Përndryshe, për çfarë po luaj? Sigurisht, që ta rikthej Parmën në Serie A. Dhe më pas? Pothuajse me siguri Mancini nuk do të më telefonojë, me të drejtë, ai ka njerëzit e tij, grupin e tij. Sidoqoftë, unë kam nevojë të di se do të ketë një Kupë Bote në Katar për të vazhduar të luaj dhe ëndërroj”.