Dje pasdite, AC Milan, me “Fondacionin Milan” dhe mbështetjen e “Off-White” përuroi një qendër sportive të vendosur në territorin e famullisë së Santa Maria Madre della Chiesa, në lagjen Gratosoglio, në periferinë jugore të Milanos, e projektuar për të qenë një hapësirë ​​shumëfunksionale për të rinjtë sportivë.

E përbërë nga dy fusha futbolli me nga 5 lojtarë, një fushë basketbolli dhe një fushë volejbolli, kjo qendër sportive do të jetë një mjet i rëndësishëm për integrimin dhe përfshirjen sociale.

Në inaugurim ishte ​​i pranishëm edhe kapiteni i Milanit, Davide Calabria, i cili u shpreh për gazetarët e pranishëm: “Derbi i Champions-it (dy gjysmëfinalet ndaj Interit) është ende pak larg, jemi të përqendruar te ndeshjet e tjera, duke filluar nga Roma.

Përshëndes të gjithë fëmijët e pranishëm, është kënaqësi të jem këtu. Kam kaluar këtu afër, kam jetuar për dy vite në këtë zonë dhe ishte mirë që u ktheva. Mos harroni, gjërat që keni nevojë janë edukimi dhe respekti i ndërsjellë. Këto janë shumë të rëndësishme për njeriun”.