Fabio Capello ka lartësuar atë që po bën Barcelona në sezonin aktual, me në krye trajnerin gjerman, Hansi Flick. Loja spektakolare dhe rezultatet pozitive, edhe pse me kushtëzime të ndjeshme financiare, shpërthimi si yje të vërteta i disa lojtarëve të rinj nga akademia “La Masia” në ekipin e parë, po mahnisin botën.

Sigurisht, ish-trajnerit të shquar italian nuk mund të mos i binte në sy ky lloj “revolucioni”, të cilin po e shijon maksimalisht: “Ajo që Barcelona po bën tani është një fitore e madhe për futbollin; dëshmon se paratë nuk janë gjëja kryesore për suksesin e një klubi. Gjithçka që Barça po bën tani e lejon të pretendojë me krenari se është skuadra më e mirë në botë, pa asnjë dyshim.

Fitoret kundër klubeve të mëdhenj si Bayern Munich dhe Real Madrid, sigurisht që i japin besimin e duhur për të vazhduar në këtë rrugë. Është e mrekullueshme ta shohësh Barcelonën të kthehet në majë për hir të integritetit të futbollit, katalanasit janë në rrugën e duhur.

Ajo që Hansi Flick po bën me ta, që nga mbërritja e tij, meriton mirënjohje dhe respekt. Ai ka ndryshuar nivelin e skuadrës blaugrana, shtypjen e saj, forcën fizike dhe zbatimin e kurthit ‘offside’, që është bërë kryelajm i botës së futbollit së fundi, pas ‘El Clasico’. Flick ka bërë që Barça ta aplikojë pozicionin jashtë loje si kurrë më parë.

Trajneri gjerman luajti kundër Bayern Munich dhe Real Madridit me një mbrojtje të avancuar dhe kurthin e ‘offside’, gjë që kërkonte guxim. Kjo tregon forcën që posedon ky trajner i mahnitshëm. Barcelona mund ta fitojë këtë sezon edhe Ligën e Kampionëve, pse jo. Aktualisht po luan futbollin më të mirë në mesin e të gjitha klubeve elitare. E vetmja gjë që i mbetet skuadrës së Flick tani është ta ruajë këtë vrull, forcë dhe rrugë. Po, kjo është rruga drejt titujve”.