Chelsea fitoi me vështirësi 2-1 ndaj Bournemouth në takimin e javës së fundit në Premier League, duke siguruar një vend në Conference League sezonin tjetër. Gjithsesi, trajneri Mauricio Pochettino, që udhëhoqi Chelsea në pesë fitore radhazi për të përfunduar sezonin, është i pasigurtë për të ardhmen e tij.

Trajneri argjentinas shprehet se nuk e di nëse Chelsea do të marrë ndonjë vendim për ta larguar nga detyra, pasi të bëjnë një vlerësim të sezonit. Pochettino shton se “telefoni i tij do të qëndrojë i ndezur”, ndërkohë që thashethemet shtojnë se pritet një rikonfirmim i tij në detyrë.

“Mund t’ju them se të premten mbrëma, presidenti Todd Boehly më ftoi për darkë. Ishte një darkë shumë e bukur së bashku, por nuk di të them asgjë për thashethemet e një rishikimi të kontratës mes nesh. Stafi im do të fluturojë sot me pushime. Unë do të qëndroj disa ditë në Londër dhe telefoni im do të jetë i ndezur”, tha Pochettino.