Barcelona është e gatshme të dëgjojë ofertat për Philippe Coutinho dhe është gati të bëjë një sakrificë të madhe financiare, për të hequr qafe brazilianin, i cili në Spanjë nuk ka dhënë atë që pritej.
Bordi i Barçës do të jetë i gatshëm të diskutojë ofertat që nisin prej 80 milionë eurosh, edhe me një humbje të konsiderueshme financiare, sepse e bleu brazilianin për 120 milionë euro në janar 2018, nga Liverpool.
Coutinho pritej të formonte një “tridhëmbësh” të fuqishëm në sulmin e Barçës, së bashku me Luis Suarez dhe Lionel Messi, por nuk i ka përmbushur pritshmëritë në Spanjë. Ndërkombëtari i Brazilit ka startuar në 16 ndeshje, ndërsa 10 ndeshje i ka luajtur si zëvendësues në këtë kampionat. Ai nuk i ka luajtur 90 minuta të plota që nga janari.
Gjithsesi, destinacioni i Coutinho-s mbetet mister. Një lëvizje e tij drejt Manchester United nuk duket e mundshme, shkruan “Goal.com”. “Djajtë e Kuq” kanë qenë të lidhur ngushtë me brazilianin, por rikthimi në Premier League nuk është aktualisht një opsion për Coutinho. Mesfushori nuk joshet nga ideja e kthimit mbrapa, pasi familja e tij luftoi për t'u përshtatur plotësisht me jetën në Angli, ndaj PSG shfaqet si opsioni më i besueshëm.
Klubi kampion i Ligue 1 është i vetmi gjigant europian, jashtë Anglisë, që i ka mjetet financiare për të përballuar pagën e lojtarit, ndërsa mundësia për t’u bashkuar me kolegët e kombëtares si Neymar, Thiago Silva dhe Marquinhos ka gjasa të ndikojë.
Bayern Munich, i cili do ta përballonte pagën e tij, duket se ka gjasa të nënshkruajë me James Rodriguez për një marrëveshje të përhershme. Pavarësisht se PSG duket një opsion tërheqës për Coutinho, nuk ka ende kontakte.
