Në një intervistë për “Marca”, mbrojtësi i majtë i Chelsea dhe i kombëtares spanjolle, Marc Cucurella, ka ndarë mendimet e tij për Kampionatin Europian të fituar kësaj vere. Ai ka rrëfyer momente brenda dhe jashtë fushe, mes polemikave, triumfeve dhe përjetimeve personale.
Intervista e Marc Cucurella reflekton ekuilibrin mes përulësisë, ambicies dhe vetëdijes për vlerën që ka të qenit pjesë e një kombëtareje kampione.
Cucurella kujtoi deklaratat e Neville, i cili kishte kritikuar Spanjën, duke thënë se nuk do ta fitonte Europianin për shkak të lojtarëve si ai: “Claudia (gruaja ime) donte t’i përgjigjej menjëherë, por i thashë të priste. Pas finales kundër Anglisë, ne iu përgjigjëm në fushë dhe jashtë saj”.
Trajneri i Spanjës kishte një rol kyç në rritjen e besimit të Cucurella: “Kur më grumbulloi në mars, pas një dëmtimi, e përjetova si shpërblim. Që nga ajo kohë luajta në të gjitha ndeshjet, duke u ndjerë në formë dhe plot besim”.
Rreth polemikave për topin me dorë në zonën e portës (pra penalltinë e pretenduar nga kundërshtari) kundër Gjermanisë, spanjolli shtoi: “Ata mendojnë se u eliminuan prej atij topi me dorë, por kishte ende shumë kohë për t’u luajtur. Edhe ne mund të ishim ankuar për mos dhënien e një kartoni të kuq për Kroos. Kur humbet, gjithmonë kërkon diçka për t’u ankuar, por futbolli është kështu”.
Cucurella vlerësoi brezin e ri të futbollistëve spanjollë, duke përmendur posaçërisht Lamine Yamal dhe Nico Williams, të cilët ishin vendimtarë në gjysmëfinalen kundër Francës: “Kur je i ri dhe luan një gjysmëfinale, presioni është i madh. Lamine, me golin e tij, na dha jetë në një moment të vështirë”.
Të luante finalen kundër Anglisë kishte një domethënie të veçantë për Cucurella, sidomos për shkak të karrierës së tij në Premier League: “Ishte ndeshja ku u ndjeva më i qetë, e kuptova se do të fitonim. E dinim që triumfi ishte i yni”.
Të jesh pjesë e një brezi historik: “Të jesh pjesë e kësaj skuadre është diçka që do ta mbaj gjithmonë me vete. Kur shikon lojtarët që kanë fituar para nesh, kupton që po shkruajmë historinë tonë. Është një motivim për të vazhduar të rritemi dhe treguar se ende mund të japim shumë”.
