E ardhmja e Matthijs de Ligt mund të jetë shumë larg Bayern-it.

Jo menjëherë, por holandezi ka mbetur prapa në hierarkinë e Thomas Tuchel, i cili preferon Kim (aktualisht luan në Kupën e Azisë) dhe Upamecano në qendër të mbrojtjes.

Ish-mbrojtësi i Ajax-it dhe Juventus-it nuk po kalon një sezon të lehtë, por ka vendosur të luftojë deri në fund për të ndryshuar mendjen e trajnerit, duke hedhur poshtë propozimin e një klubi të madh.

Lojtari i datëlindjes 1999, sipas informacioneve të raportuara nga L’Equipe, ka refuzuar Paris Saint-Germain: klubi francez u përpoq pa fat në orët e fundit, pasi kuptoi se nuk mund të arrinte objektivin e tyre kryesor, Leny Yoro.

Një lëvizje e diktuar edhe nga mungesa e besimit te ardhja e re, Lucas Beraldo, një lojtar për të cilin parisienët besojnë shumë, por që do t’i duhet kohë për t’u përshtatur me realitetin e ri.

Prandaj, De Ligt do të qëndrojë në Mynih të paktën deri në qershor, kur më pas do të nxirren përfundimet. Pretendentët nuk mungojnë dhe PSG mund ta provojë sërish në verë.