Për koleksionin e madh dhe luksoz të makinave të Cristiano Ronaldos është folur shpeshherë. Pas blerjes së tij të fundit të çmendur, një ‘Ferrari Purosangue’ me vlerë 390 mijë euro, që shtohet në garazhin e tij të mbushur me ‘Lamborghini’, ‘Bugatti’, ‘Porsche’ dhe ‘Rolls-Royce’, tani ka shtuar një xhevahir të ri. Bëhet fjalë për një ‘BMW XM’ me vlerë rreth 200 mijë euro.
SUV-i luksoz është dhuratë nga filiali saudit i kompanisë gjermane për futbollistët e Al Nassr. Bëhet fjalë për versionin ‘Red Label’ të modelit, me një vlerë rreth 200 mijë euro. Pamja e jashtme veçohet nga grila metalike me ngjyrë ‘Toronto Red’, që i shton prekje sportive elegancës ekstreme të mjetit.
‘BMW XM’ është e pajisur me një motor V8 4.4 litra me fuqi prej 489 kuajfuqi, i kombinuar me një motor elektrik prej 147 kË, të integruar në kutinë automatike me 8 marshe. Kombinimi i këtyre motorëve arrin një total prej 653 kuajfuqi. Ajo mund të arrijë një shpejtësi maksimale prej 270 km/h dhe përshpejton nga 0 në 100 km/h në vetëm 4.3 sekonda.
Përveç CR7, disa nga yjet e tjerë të Al Nassr kanë pozuar me dhe brenda kësaj makine, e cila u dhurua nga marka gjermane dhe iu shpërnda lojtarëve nga klubi saudit.
