Milani është në prag të ndeshjes më të rëndësishme të vitit, teksa pret PSG në “San Siro”. Fitorja është pothuajse e detyrueshme për të kultivuar shpresat dhe shmangur eliminimin që në grupet e Ligës së Kampionëve. Nga ana e saj, “Curva Sud” po e përgatit ndeshjen në dy fronte të dallueshme dhe konvergjente.

Nga njëra anë, duke treguar gjithë mbështetjen e mundshme për një ekip në vështirësi; nga ana tjetër duke e bërë më se të komplikuar mbrëmjen për Gianluigi Donnarumma, i konsideruar si “tradhtar” dhe i pritur gjithmonë keq, në dy paraqitjet e tij në Milano me kombëtaren, nga tifozët e tij të vjetër.

Në javën para ndeshjes, pjesa më e zjarrtë e tifozëve të Milanit ka shpërndarë lajmin për rikthimin e Donnarumma në “San Siro”, për herë të parë si kundërshtar. Megjithatë, tani që ndeshja kundër PSG-së po afrohet, detajet se çfarë do të jetë e rëndësishme, e zjarrtë, në kuptimin negativ, po dalin në pah.

Për “Curva Sud” të Milanit, Gigio Donnarumma është një “njeri pa vlera”. Për këtë arsye, anëtarët e këtij tifo-grupi do të veshin fanellën me numrin 71, që në grimasën napolitane, një tjetër referencë për portierin, do të thotë pikërisht këtë (njeri pa vlera).

Më tej, është planifikuar hedhja e kartëmonedhave false, duke denoncuar konceptin “Dollarumma” të realizuar tashmë në verën e transferimit të tij nga Milani te PSG, gjatë një ndeshjeje të kombëtares U-21, e cila shoqërohej me fishkëllima shurdhuese.