Futbollisti i Vitit në Francë, Kylian Mbappe e ka emëruar bashkatdhetarin William Saliba si një fitues po aq të merituar për këtë çmim.
Superylli i Real Madrid u shpall së fundmi Futbollisti i Vitit në Francë për sezonin 2023-24. Ishte hera e katërt që fitonte këtë nder, pasi e kishte fituar edhe në 2023, 2019 dhe 2018.
Kylian Mbappe pati një sezon të shkëlqyer në 2023-2024 me Paris Saint-Germain, duke shënuar 44 gola dhe duke dhënë 10 asiste në 48 ndeshje në të gjitha kompeticionet.
Ai ishte gjithashtu golashënuesi më i mirë në Ligue 1 (27), UEFA Champions League (tetë) dhe Coupe de France (tetë).
Për sa i përket trofeve kolektive, skuadra e tij fitoi Ligue 1, Coupe de France dhe Trophée des Champions. Ai gjithashtu ishte kapiten i Francës deri në gjysmëfinale e Euro 2024, por ata humbën kundër kampionëve të ardhshëm, Spanjës.
Mbrojtësi i Arsenalit, William Saliba, doli i dyti në votimet për futbollistin francez të vitit, ndërsa portieri i Milan, Mike Maignan u rendit i treti.
Mbappe, i cili fitoi me 56 pikë, e kaloi William Saliba me vetëm pesë pikë. Duke folur për qendërmbrojtësin e Arsenalit në një intervistë për France Football, Mbappe tha:
“Duhet të jemi të drejtë, edhe William Saliba do ta kishte merituar këtë trofe”.
