Pas fitores 2-1 ndaj Brentford në kampionat Erik Ten Hag ka marrë pak frymë lirshëm, duke qëndruar ende si trajner i Manchester United edhe pse situata është ende e ndërlikuar. Aq sa thashethemet prë largimin e tij nuk kanë mbaruar asnjëherë, madje së fundi janë shtuar kandidatët për stolin e “djajve të kuq”.
E përditshmja britanike “Daily Mail” ka befasuar të gjithë me lajmin se Xavi Hernández, ish-trajneri i Barcelonës deri në maj, po shihet si një zëvendësues i mundshëm në rast se Manchester United vendos seriozisht të shkarkojë Ten Hag. Madje palët kanë kohë që janë duke biseduar për këtë ndryshim në stol.
Një delegacion i klubit anglez, udhëhequr nga CEO i tij, Omar Berrada, ka qenë në Barcelonë të enjten e kaluar. Pavarësisht se klubi ka reaguar me disa takime të planifikuara me bashkëpronarin Sir Jim Ratcliffe, thuhet se ata kanë patur një takim me përfaqësuesit e Xavi, aktualisht pa skuadër.
Mësohet se “djajtë e kuq” kanë kontaktuar Xavi me telefon në dy raste gjatë muajve të fundit. Ndaj, mbetet të shihet se si do të evoluojë situata, pasi Ten Hag ka një kontratë me Manchester United deri më 30 qershor 2026. Për stolin në “Old Trafford” janë përfolur shumë kandidatë gjatë muajve të fundit.
