Ekipi i Flamurtarit në basketboll për femra fitoi mbrëmjen e sotme Superkupën e Shqipërisë. Në finalen e luajtur në Fier, skuadra vlonjate mundi 81-59 Tiranën, një fitore që është një hakmarrje pas finales së humbur në Kupën e Federatës.
Ndeshja ishte mjaft e fortë, teksa të dyja skuadrat rivalizuan fort, por në fund vlonjatet ishin më të sakta e të kujdesshme. Tirana bëri disa gabime, të cilat Flamurtari i ktheu në pikë, duke u shkëputur e fituar me meritë ndeshjen.
Të shumtë tifozët e pranishëm, që shijuan një ndeshje të mirë dhe emocionuese. Basketbollistja e Flamurtarit, Jose Johnson, me 20 pikë, u shpall MVP e ndeshjes, ndërkohë që pesë lojtare të ekipit vlonjat realizuan mbi 12 pikë, cka bëri diferencën.
