Në përfundim të ndeshjes ku Partizani humbi 1-2 ndaj Luftëtarit, trajneri i “Të Kuqve”, Skënder Gega u ndal të analizojë ndeshjen. Trajneri beson se do e arrijnë kualifikimin në ndeshjen e kthimit në Gjirokastër dhe sot theksoi se u ndëshkuan nga dy episode me goditje standarde.
Favoritë por humbët – Hap fals, por në kupë janë dy ndeshje. Ka mbaruar pjesa e parë, shpresojmë që atë që bëri Gjirokastra këtu ta bëjmë ne në Gjirokastër.
Kualifikimi objektiv edhe për lojtarët – Lojtarët që nisën ndeshjen, që kanë kaq kohë që luajnë bashkë, edhe ata që e nisën nga stoli kanë vlera. Rëndësi ka që të mësojmë nga kjo ndeshje e humbur.
Vlerësimi i ndeshjes nga lojtarët – Edhe nga lojtarët ishte ndeshje e vlerësuar, edhe pse interpretimi s’ishte ashtu si duhet. Kishim mundësi ta mbyllnim ndeshje, por u ndëshkuam në dy raste. E vlerësoj çdo ndeshje kupe apo miqësore dhe kemi humbur një ndeshje në kupë. Është vetëm pjesa e parë.
I kënaqur me përqendrimin – Ishim të përgjumur, nuk e vlerësuam në maksimum edhe pse ua kërkova vazhdimisht lojtarëve. S’duhet të kishim panik e përgjumje, shpresoj që të na shërbejë dhe të korrigjohemi e të shohim gabimet ashtu siç janë. Do shkojmë në Gjirokastër, asgjë s’është mbyllur.
Momenti më i vështirë? – Ne kemi pas edhe humbje në kampionat, kemi ditur të reagojmë. Nuk jemi pesimistë, kemi edhe një 90 minutësh tjetër. Ekipi reagoi shumë mirë në fushë. Ngecëm, dhamë shumë krose e luajtëm në gjysmën e tyre të fushës. Futbolli kështu është, kur nuk shënon e pëson.
Shanset e kualifikimit – Aq shanse sa kishte Gjirokastra për fitoren e sotme.
Do mundohemi që gjërat pozitive ti shtyjmë më lart dhe gjërat negative ti korrigjojmë. Nuk do jetë ndeshja me Teutën si kjo sot. Besoj se e kishim vlerësuar pavarësisht se u përgjumëm dhe u ndëshkuam. Nuk bëj dot parashikime.
