Ylli i Manchester City-t, Erling Haaland raportohet se po shpenzon 2.1 milionë sterlina  për dy avionë privatë, ndërsa perandoria e tij e biznesit po zgjerohet.

Sulmuesi norvegjez, i cili ka fituar Këpucët e Artë të Premier League në secilin nga dy sezonet e tij në futbollin anglez, e ka nisur sezonin 2024-25 me katër gola, duke përfshirë një tregolësh gjatë dy ndeshjeve.

Haaland po fluturon edhe jashtë fushës, pasi është zbuluar se firma e tij për të drejtat e imazhit York Promotions Ltd ka kaluar edhe në botën e aviacionit.

Një deklaratë brenda llogarive të tyre vjetore thotë: “Kompania ka hyrë në një marrëveshje për të blerë dy avionë për një shumë prej £ 2,155,342”.

York Promotions Ltd ka krijuar 12 milionë £ në asete për 12 muajt deri në dhjetor 2023, me 7 milionë £ në para të gatshme dhe 5 milionë £ ende për t’i paguar Haaland nga marka të ndryshme emrash të mëdhenj me të cilët ai ka partneritet. Këto fonde po e lejojnë lojtarin e Cityt të udhëtojë me stil.

Haaland ka plane të mëdha për nismat jashtë fushës, me The Mirror që raporton për një model biznesi që synon të lëvizë në drejtime të ndryshme – duke përfshirë ndjekjen e ikonës argjentinase Lionel Messi në tregun e pijeve energjike.

Dokumentet e depozituara në Zyrën e Pronësisë Intelektuale të Mbretërisë së Bashkuar nga avokatët e Haaland gjatë një beteje ligjore për të ri-tregtuar emrin e tij thonë se lojtari norvegjez dëshiron të shesë:

“Ujë të pijshëm; pije sportive; pije energjike; pije frutash; pije me lëng frutash; pije proteinike; pije me karbohidrate; pije sportive të pasura me proteina; pije energjike që përmbajnë kafeinë”.