U hodh mesditën e sotme shorti i 1/8 finale të Ligës së Europës, kompeticionit të dytë për nag rëndësia në futbollin kontinental të klubeve. Goglat u përzien nga ambasadori i finales së Dublinit, John O’ Shea. Ish-mbrojtësi i Manchester United, ndër të tjera, zbuloi me duart e tij përballjet e këtij raundi, të cilat janë të zjarrta dhe me pritshmëri të mëdha, sepse tashmë nuk ka më sfida të lehta.
Ja 8 përballjet e këtij raundi:
Freiburg–West Ham
Benfica-Rangers
Roma-Brighton
Olimpique Marseille-Villarreal
Sparta Pragë-Liverpool
Sporting CP – Atalanta
Milan – Slavia Praga
Bayer Leverkusen – Qarabag
Sikurse duket, janë evituar përplasjet e mëdha, ato të konsideruara si “ferri”, të tilla si Liverpool-Milan-Roma- Leverkusen etj. Megjithatë, verdhekuqtë e De Rossit kanë “peshkuar” Brighton e një trajnerit italian, De Zerbi. Fituesit e këtij raundi do të shkojnë në çerekfinale, me shortin përkatës që është caktuar të premten e 15 marsit. Humbësit e 1/8 finale do të dalin jashtë Evropës për sezonin aktual.
9 kombe janë të përfaqësuara ende në këtë kompeticion, teksa kryesojnë Italia dhe Anglia me nga 3 skuadra (Atalanta, Milan dhe Roma në njërën anë; Brighton, Liverpool dhe West Ham në anën tjetër). Ato pasohen nga Çekia (Slavia Pragë dhe Sparta Pragë), Gjermania (Bayer Leverkusen dhe Freiburg) dhe Portugalia (Benfica dhe Sporting CP).
Sikurse dihet, finalja e “Europa League” do të luhet në stadiumin “Aviva” të Dublinit më 22 maj. Kjo është hera e dytë që ky objekt sportiv pret një finale të turneut të dytë kontinental, pas finales së vitit 2011, të fituar nga Porto ndaj Bragës. Datat e zhvillimit të ndeshjeve të 1/8 finale të “Europa League” janë këto: më 7 mars (vajtje) dhe 14 mars (kthimi).