I dyti në renditjen e përgjithshme, ende me portën e pastër, Interi po bën një rrugëtim europian të nivelit më të lartë. Kënaqësia e Simone Inzaghit për këtë u shfaq qartë pas suksesit të çmuar 1-0 në shtëpi, ndaj Arsenalit të Artetës: “Kam marrë përgjigje të rëndësishme nga ata që luajnë më pak.

Kur flasim për 23 titullarë nuk e themi vetëm për hir të fjalës. Kjo fitore ishte shumë e rëndësishme. Kundërshtari u shfaq shumë intensiv dhe sinqerisht më duhet të them se Arsenali ishte një nga kundërshtarët më të mirë me të cilët jemi përballur.

Ne e filluam mbarë, në pjesën e dytë u mbrojtëm mirë. Është krenari që jemi përballur shumë mirë me City dhe Arsenalin. Po ruajmë një mesatare shumë të mirë pikësh, por kanë mbetur edhe katër ndeshje. Dy ndeshjet e ardhshme, me Leipzig dhe Leverkusen, do të jenë shumë sfiduese”.

Fitorja e mbrëmjes së djeshme për Interin u karakterizua nga vuajtjet: “Skuadra tregoi kompaktësi. Kur je në një klub si ky nuk e zgjedh kompeticionin, por synon gjithmonë të luash sa më shumë ndeshje. Tani nuk duhet të ndalemi, jam i lumtur me soliditetin që treguam ndaj një rivali shumë cilësor, si Arsenali”.