Shqipëria e nis me humbjen 2-1 “Euro 2024”, duke vuajtur shumë ndaj Italisë. Edhe pse e gjeti golin mrekullisht që në minutën e parë, me anë të Nedim Bajramit, duke vendosur rekordin historik në këtë kompeticion, kombëtarja kuqezi tregoi se është ende larg kampionëve në fuqi të Europës.

Këta të fundit duket se reaguan si të tërbuar pas “turpërimit” që në minutën e parë, duke na përmbysur për 17 minuta lojë. Golat e Bastoni dhe Barella kthyen qetësinë tek Italia, e cila mendoi shumë ta administronte fitoren, sidomos në pjesën e dytë, me qarkullim të dendur topi.

Kuqezinjtë tanë, edhe pse bënë zëvendësime, duke hedhur në fushë Manaj, Hoxha, Laci dhe Muci, nuk krijuan rrezik serioz te porta e Donnarumma deri në minutën e 90-të. Limiti i lohës së rregullt ishte drithërues, me Manajn që fitoi bukur duelin me Bastoni dhe e kaloi topin mbi trupin e portierit axurr, por shumë pak jashtë kuadratit.

Nëse në minutën e parë ishim në delir, në të fundit e kohës së rregullt mund të themi se ishim të pafat. Pas 5 minutave shtesë, ndeshja u mbyll me fitoren 2-1 të Italisë, e cila na përmbysi me tërbim në 17 minuta lojë, pastaj mendoi më shumë të administronte lojën dhe epërsinë.

Ia doli me sukses, duke marrë fitoren e parë në këtë Europian dhe kryesuar grupin tonë bashkë me Spanjën. Kujtojmë se po sot, kombëtarja iberike fitoi pastër 3-0 ndaj Kroacisë. Ndeshja e ardhshme për kuqezinjtë tanë do të jetë ndaj Kroacisë.