Juventus u rikthye te fitorja në kampionat pas disa paraqitjesh jo fort bindëse në kampionat dhe Europë. Bardhezinjtë fituan 2-0 në fushën e Udinese dhe tashmë janë 4 pikë pas Napolit kryesues, ndërkohë që përgatiten për ndeshjen ndaj Lille në Champions.

Gjithsesi, për mbrojtësin Andrea Cambiaso, skuadra nuk është ende në nivelet e saj më të mira. “Ne jemi ende nën mesataren që duhet të japim, ndaj duhet të ecim përpara, nuk mund të shkojmë prapa“, tha mbrojtësi juventin.

Duke folur për suksesin ndaj Udinese, ai shtoi: “Çfarë ka ndryshuar? Është më shumë një problem përqendrimi, pasi shpesh jemi nxituar shumë në veprimet tona dhe kjo na ka penalizuar në disa ndeshje”.

“Duhet të stërvitemi shumë dhe të përmirësohemi, duke ngritur nivelin e lojës tonë, për të evituar sërish gabimet në mbrojtje. Fitorja e pastër në Udine është një sinjal i mirë, por tani duhet të mendojmë për Europën”, tha Cambiaso.