Juventus i jep fund thatësirës prej 4 javësh pa fitore dhe është rikthyer sot te tre pikët në Serie A, pasi mposhti 4-0 Pisa-n, në sfidën e luajtur në “Allianz Stadium”, e vlefshme për javën e 28-të. Pjesa e parë ishte e vakët dhe pa ndonjë rast serioz.
Pjesa e dytë foli e gjitha për bardhezinjtë. Sfida u zhbllokua në minutën e 54-të, ku pas një aksioni të bukur dhe kombinimi model mes Franscico Concecao-Kenan Yildiz-Andrea Cambiaso, ishte pikërisht ky i fundit që dërgoi me kokë topin në rrjetë.
Në minutën e 65-të u shënua goli i dytë. Së pari, goditja e Manuel Locatelli-t përplaset në shtyllë, por në tentativën e dytë këtë herë nga Khephren Thuram, topi përfundoi në kuadrat.
Në minutën e 75-të, ishte radha e Kenan Yildiz për të shënuar golin e tretë me një goditje të bukur brenda zonës. Në minutën e fundit shtesë ishte radha e Jeremie Boga për të shënuar golin e katërt dhe të fundit për këtë takim. Asnjë minutë për Edon Zhegrovën sonte.
Juventus fiton 4-0 dhe renditet i gjashti me 50 pikë, një pikë më pak se Roma dhe Como që janë më sipër. Pisa në rënie të lirë drejt Serie B, pasi ka vetëm 15 pikë.
