Dëshira e Franck Kessié për t’u rikthyer në Itali po bëhet gjithnjë e më e fortë. Pas tri sezonesh tek Al-Ahli në Arabinë Saudite, mesfushori nga Bregu i Fildishtë është gati të nisë një aventurë të re në Europë, me synimin për t’u rikthyer në Serie A, kampionatin ku u afirmua me fanellat e Atalantës dhe Milanit.
Mes klubeve që po ndjekin me interes situatën është Juventusi. Kontaktet mes palëve kanë ekzistuar edhe më parë, por tani kushtet duken më të favorshme. Futbollisti i lindur në vitin 1996 konsiderohet një mundësi e mirë falë përvojës ndërkombëtare, aftësisë për të garantuar ekuilibër në mesfushë dhe faktit se mund të transferohet pa kosto kartoni. Këto cilësi pëlqehen si nga drejtuesit bardhezinj, ashtu edhe nga Luciano Spalletti, i cili kërkon më shumë personalitet në repartin e mesfushës.
Pengesa kryesore mbetet paga. Pas kontratës së majme në Arabinë Saudite, Kessié do të duhet të ulë ndjeshëm kërkesat financiare për të bërë të mundur transferimin. Sipas “Tuttosport”, këtë javë pritet një takim mes përfaqësuesve të tij dhe Giovanni Carnevalit, ku do të shihet nëse dëshira për t’u rikthyer në Serie A do të mjaftojë për të kapërcyer diferencën mes kërkesës prej 10 milionë eurosh në sezon dhe ofertës së Juventusit prej 5 milionë eurosh.
