Kapiteni i Anglisë, Harry Kane, ka shpjeguar arsyet e paraqitjeve të dobëta të skuadrës së tij në EURO 2024 pasi Tre Luanët barazuan 1-1 kundër Danimarkës.
Sulmuesi tha se ata po përballen me telashe në lojën me dhe pa top, dhe se çdo lojtar i skuadrës ishte nën nivelin për sa i përket përpjekjes dhe vendosmërisë.
30-vjeçari shënoi golin e tij të parë në EURO 2024 në minutën e 18-të të ndeshjes.
Megjithatë, Danimarka dominoi më pas, duke pasur më shumë goditje dhe më shumë posedim, dhe u shpërblye siç duhet kur mesfushori i Sporting Morten Hjulmand shënoi një gol mahnitës në minutën e 34-të.
Duke folur për BBC pas ndeshjes, ylli i Bayern Munichut tha:
“Unë mendoj se ne kemi probleme në lojën me dhe pa top. Mendoj se presingu në të dyja ndeshjet nuk ka qenë i duhuri dhe nuk kemi qenë mjaftueshëm mirë në lojën me top.
“Të gjithë po bien pak më poshtë niveleve të tyre. Ishte e vështirë, por ne jemi të qetë. Nuk ishte ndeshja jonë më e mirë, por dolëm me një pikë”.
Trajneri i Anglisë, Gareth Southgate është kritikuar gjithashtu për mentalitetin mbrojtës pasi kaloi në avantazh në të dyja ndeshjet e deritanishme. Kane vuri në dukje se skuadra duhej ta mbajë ritmin lart pas kalimit në avantazh, duke shtuar:
“Unë mendoj se është diçka në të cilën duhet të përmirësohemi. Mendoj se po i fillojmë ndeshjet mirë, por kur skuadrat tërhiqen më mbrapa, ne nuk jemi plotësisht të sigurt se si ta bëjmë presingun.
“Në pjesën e dytë ne u përpoqëm të ndryshonim pak, por ishte e vështirë. Meritat i shkojnë edhe Danimarkës. Në përgjithësi, ne duhet të shikojmë prapa dhe të shohim se ku mund të përmirësohemi”.
