Trajneri i Chelsea, Frank Lampard, u shpreh se kërkon më shumë nga skuadra e tij për të siguruar përfundimisht një vend në Champions League sezonin tjetër. Fitorja 1-0 që “blutë” e Londrës arritën ndaj Norwich në Premier League ishte e rëndësishme për të siguruar një vend mes 4 skuadrave më të mira.

“Në këtë moment të sezonit rezultatet janë të rëndësishme për të arritur qëllimin. Ne nuk i dhamë asnjë shans ekipit rival që të gjuajë në portën tonë për 90 minuta. Pavarësisht rezultatit, luajtëm si ekip”, tha Lampard. Skuadra e Norwich në këtë ndeshje nuk gjuajti asnjëherë në portën e Chelsea.

Trajneri i Chelsea shpjegon: “Na duhet të lëvizim më shpejt topin dhe të jemi më të lëvizshëm në fushë. Këtë gjë e kemi bërë pjesërisht këtë sezon, por nëse duam të shkojmë më larg na duhet ta bëjmë këtë gjë më shpesh. Gjithsesi, fituam dhe nuk dua të kritikoj skuadrën”.