Milan përgatit divorcin zyrtar me mesfushorin Tiemoue Bakayoko, që pas përfundimit të huazimit me kuqezinjtë do të rikthehet të luajë me Chelsea, klubi që ka në pronësi kartonin e lojtarit. Kuqezinjtë nuk do të shfrytëzojnë klauzolën në favorin e tyre, sipas së cilës duhet të paguajnë 35 milionë euro për të patur 100% kartonin e lojtarit francez.

Gjatë sezonit të sapombyllur, Bakayoko luajti 42 ndeshje dhe realizoi vetëm 1 gol me fanellën kuqezi. Nga ana teknike, lojtari ka bindur drejtuesit e Milanit, por karakteri i tij shpesh ka qenë problematik për skuadrën. Ndaj, mesfushori 24-vjeçar do të rikthehet në Londër, për të veshur sërish fanellën e “blues”.

Duket se kjo është edhe dëshirë e lojtarit, që ka shansin e madh që vitin tjetër të luajë në Champions League me Chelsea. Duke folur për “L’Equipe”, menaxheri i lojtarit, vëllai i tij Abdoulaye Bakayoko, tha: “Ka disa skuadra që janë interesuar për lojtarin, por ne duam të rikthehemi te Chelsea. E njohim këtë ekip, do të luajë në Champions dhe Tiemoue kërkon vijueshmëri. Ndaj ka vendosur të luajë me Chelsea sezonin tjetër”.