A mund të kthehet Aymeric Laporte në Europë së shpejti? I intervistuar nga “Cadena Ser”, mbrojtësi i Al-Nassr tha se dëshiron të kthehet në Kontinentin e Vjetër në të ardhmen, për të qenë më afër familjes së tij. Dhe kjo mund të ndodhë më shpejt se sa pritej, edhe nëse kontrata e tij zgjat deri në vitin 2026. Emri i tij, në fakt, përmendet shpesh nga shtypi spanjoll si blerje e mundshme për Real Madridin, për të forcuar mbrojtjen e bardhë, të shkatërruar nga dëmtimet e Eder Militao, David Alaba dhe Dani Carvajal.
I pyetur për interesimin e Real Madridit, ish-lojtari i Athletic Bilbao tha se ishte mjaft i kënaqur dhe i hapur ndaj kësaj mundësie: “Unë nuk jam në dijeni të ndonjë oferte, kam lexuar atë që ju të gjithë keni lexuar. Është e qartë se mund të jetë një gjë e mirë, pa diskutim nuk do ta shikoja me përbuzje një ekip si Real Madridi”.
Francezi, i natyralizuar si spanjoll më 2021, fitoi Kampionatin Europian 2024 me “La Roja”. Ai u bashkua me Al-Nassr në vitin 2023, pas largimit nga Manchester City: “Rezultatet tregojnë se ishte një zgjedhje e mirë. Unë nuk do të varem nga ajo që njerëzit mendojnë për të marrë vendime të rëndësishme në jetën time”.
