Me 9 pikë të plota pas tri ndeshjeve të para në Premier League, Liverpool udhëheq renditjen bashkë me Manchester City. E veçanta është se skuadra e “reds”, drejtuar nga holandezi Arne Slot, ende nuk ka pësuar asnjë gol.

Në sfidën e fundit, Liverpool mundi 3-0 Manchester United, në një ndeshje të dominuar.

“United e filloi shumë agresiv dhe ne duhej ta gjenim veten në atë periudhë të lojës. Por, nëse shkoni në Old Trafford, ju e dini se do të ketë momente të vështira. Ne e kaluam atë moment e më pas dominuam e fituam”, tha Slot.

“Ajo që më pëlqeu është se pasi shënuam një gol të madh që u anulua, ne vazhduam të luanim në të njëjtën mënyrë si më parë. Në fund, ne shënuam disa gola të bukur dhe na duhej Alisson në pjesën e dytë për të bërë disa pritje të rëndësishme”, u shpreh më tej trajneri i Liverpool.

“Pavarësisht çdo komenti, ishte një fitore e merituar. Kjo është gjithçka që dëshironi të shihni si trajner në fushë, një ekip që dominon e fiton ndaj një rivali”, deklaroi Arne Slot.