Manchester United kërkon të gjejë një zëvendësues në mesfushë për Paul Pogba që është drejt largimit. Ekipi anglez ka hedhur grepat në Madrid dhe konkretisht te skuadra e Atletico Madridit. Emri që është lakuar së fundmi është Saul Niguez. Lojtari është titullar te spanjollët, por ekipi i “Djajve” është i sigurt se mund ta bindë.
Trajneri Ole Gunnar Solskjaer është gati të paguajë deri në 90 milionë euro për të, ndërsa klauzola e tij e lirimit është 128 milionë euro. Mesfushori i Spanjës mund të largohet nga Wanda Metropolitano që në janar në rast se kjo ofertë mbërrin në dyert e Atleticos.
Saul është i lidhur me Atleticon, pasi ka ndihmuar shumë skuadrën e Simeones të arrijë sukseset e shumta në Spanjë, por dhe në Champions League. Ai është një ndër shtyllat e ekipit, por gjithçka mund të ndodhë në vazhdim.
