Pas disfatës së hidhur ndaj Kilit, në “Ennio Tardini” të Parmës, kuqezinjtë do të kenë rastin sonte në mbrëmje të bëjnë autokritikë. Nuk do të jetë e lehtë, sepse Sylvinhon dhe të tijtë i pret Suedia, në fushën e saj, një kombëtare cilësore. Kjo është mundësi për të provuar lojtarë të tjerë, që luajtën pak ose fare në miqësoren pararendëse ndaj kilenëve.
Sa i takon formacionit startues, do të ketë jo pak ndryshime. Kështu, në portë do të kthehet Etrit Berisha, i cili mungoi ndaj Kilit për një problem muskulor. Edhe mbrojtja do të ketë dy startues “të rinj”, Kumbulla dhe Balliu.
I pari do të luajë përkrah kapitenit Gjimshiti, në qendër, ndërsa i dyti do të marrë përsipër rolin e Hysajt në të djathtë. Në mesfushë do të ketë vend edhe Muçi, sigurisht me pozicionim pas qendërsulmuesit Broja. Asllani dhe Bajrami do të kompletojnë treshen e këtij reparti. Reparti ofensiv do t’i besohet Muçollit dhe Hoxhës nga krahët, në ndihmë të “pykës”, Broja.
Kuptohet, kjo është një mundësi për të provuar sa më shumë lojtarë në të tilla miqësore, por edhe “tërheqje veshi” për disa titullarë të fushatës eliminatore, të cilët duket se e konsiderojnë veten të padiskutueshëm në listën finale të “Euro 2024”. Megjithatë, paraqitja e bërë në miqësoren ndaj Kilit tregoi se nuk janë aty ku duhet. Në këtë drejtim shkon edhe paralajmërimi i trajnerit Sylvinho: Kush nuk vrapon, nuk do të vijë me ne në Europian.
Ashtu si kuqezinjtë (humbën 3-0 në Parma), edhe skandinavët janë të freskët nga humbja e rëndë 5-2 në Portugali. Suedia, e cila nuk do të jetë e pranishme në finalet e Europianit të kësaj vere, do të jetë një sprovë e madhe për Shqipërinë, e përfshirë në të njëjtin grup me Italinë, Spanjën dhe Kroacinë në “Gjermania 2024”, pasi e mbylli e para në grupin e saj kualifikues.