Mesfushori Dele Alli nuk është grumbulluar nga trajneri Jose Mourinho në ndeshjen që Tottenham do të luajë në Europa League ndaj Lokomotiv Plovdiv. Me shumë gjasa, mesfushori 24-vjeçar anglez do të lërë skuadrën në fund të kësaj jave.
Sipas “Telegraph”, Dele Alli pritet të shkojë te Real Madrid, si pjesë e marrëveshjes që do të sjellë në Angli sulmuesin uellsian Gareth Bale. Edhe në ndeshjen e fundit në kampionat, atë që Spurs humbi 0-1 me Everton, Alli luajti vetëm 45 minuta.
Trajneri Mourinho e zëvendësoi mesfushorin e talentuar në fund të pjesës së parë. Edhe pse është në formë të mirë fizike, trajneri portugez nuk e grumbulloi lojtarin për ndeshjen e radhës në Europa League, shenjë që tregon se Dele Alli do të largohet.
