I riu Jamal Musiala luajti një rol të rëndësishëm në titullin e Bundesliga-s të fituar nga Bayern Munich në ndeshjen e fundit të kampionatit.

Gjermani i talentuar hyri në fushë në minutat e fundit të ndeshjes ndaj Koln-it me rezultatin e bllokuar në 1-1 që do t’i kishte penguar bavarezët të triumfonin në kampionat dhe ishte vendimtar me një goditje të saktë dhe të fuqishme me këmbën e djathtë.

Një gol për të cilin lojtari ka folur për mediat e klubit siç raportohet nga faqe të ndryshme gjermane. “Ishte një moment i pabesueshëm për të shënuar”, ka thënë Musiala.

“Çfarë mendova? Nuk mendova, thjesht festova. M’u desh pak kohë për të kuptuar se çfarë kishte ndodhur. Kur hyra si zëvendësues, sinqerisht, nuk kishim asgjë për të humbur.

“Sipas standardeve tona, ky sezon nuk ka qenë më i miri, ne e dimë se mund të jemi më të mirë, por tani, sigurisht, të gjithë jemi të lumtur që kemi arritur këtë titull.”

Për bavarezët ishte suksesi i njëmbëdhjetë radhazi në kampionat.