Fillimi i Kylian Mbappé ishte paksa i ngadaltë te Real Madridi. Sulmuesi francez, i cili nuk është thirrur nga Deschamps për ndeshjet e radhës të Ligës së Kombeve, ka bërë paraqitje të dobët ndaj Barcelonës, Milanit dhe Osasuna. Për të komentuar momentin e futbollistit transalpin ka menduar dikush që Real Madridin e njeh shumë mirë, si mbrojtësi Nacho:

“Mbappé është një nga më të mirët në botë. Kur arrin në një klub si Real Madridi, është e vështirë të përshtatesh. Kjo iu ka ndodhur të gjithëve. Nuk është njësoj të luash te Real Madridi si kudo tjetër. Kur të shpërthejë, me siguri do të jetë spektakolar”.

Nacho Fernandez këshillon edhe Florentino Perez për merkaton e pritshme në mbrojtje, për shkak të dëmtimeve të rëndësishme në këtë repart: “Unë do të doja që të mos rekrutojnë askënd në janar, por të fokusohen te të rinjtë. Ata duhet ta kenë një mundësi, karriera e tyre ka nevojë për këtë. Nëse klubi dhe trajneri janë të guximshëm, ky është momenti perfekt”.