Ka klube që mezi presin të arkivojnë një sezon për t’u harruar sa më shpejt dhe filluar sërish me frymë e fytyra të reja. Duke nisur nga pankinat. Te Napoli, guri i parë për rikonstruksionin do të hidhet në pankinë, ku sipas asaj që raporton “Gazzetta dello Sport”, i zgjedhuri është Stefano Pioli. Sipas ideve të Aurelio De Laurentiis, trajneri aktual i Milanit është në “pole-position” për të pasuar Calzona.
Aventura e Piolit në stolin e kuqezinjve do të përfundojë në fund të sezonit, pavarësisht se trajneri ka kontratë me Milanin deri në vitin 2025. Napoli është gati t’ia besojë stolin atij, por ende nuk e ka vendosur.
Napoli pëlqen Piolin, jo vetëm De Laurentiis. Brenda klubit të gjithë duket se anojnë drejt trajnerit, që vetëm dy sezone më parë fitoi trengjyrëshin me Milanin. Pioli konsiderohet gjithashtu një trajner ekspert në nivel ndërkombëtar, i besueshëm në sytë e një dhome zhveshjeje plot kampionë, i aftë për të shfrytëzuar maksimalisht skuadrën që ka në dispozicion, i zoti në zgjedhjen e një sistemi loje bazuar në grupin në dispozicion.
Detaji për të mos u nënvlerësuar: De Laurentiis vlerëson shumë mënyrat e qeta të Piolit, një trajner që di të marrë atë që dëshiron nga klubi pa ngritur tonin dhe mbi të gjitha është dikush i aftë për të arritur objektivat e vendosura. Me pak fjalë, një “njeri i korporatës”, figurë që presidentit të Napolit i pëlqen shumë në këtë moment.
Në fund të sezonit, siç u përmend, rrugët e Piolit dhe Milanit do të ndahen, duke qenë se kuqezinjtë kanë vendosur të ndryshojnë trajner. De Laurentiis po punon për të siguruar që miqësia e tij të godasë zemrën e Piolit, i cili në Napoli do ta gjente veten duke punuar ngushtë, në një rol pothuajse menaxherial, me drejtorin e ri sportiv Giovanni Manna (njeriu i zgjedhur javët e fundit nga ADL për të nisur revolucion teknik).
Për momentin, siç nënvizon “Gazzetta dello Sport”, situata është në gatishmëri. Pioli e di shumë mirë se në fund të sezonit do të përfundojë ciklin e tij te Milani, pavarësisht kontratës deri në vitin 2025, por për momentin është i fokusuar vetëm te 4 ndeshjet e fundit të kampionatit.
Më pas do të vendosë për të ardhmen e tij. Megjithatë, Pioli tërhiqet nga Napoli, një vend magjepsës, klub ambicioz që do të ketë shumë “forcë” ekonomike në merkaton e radhës për shkak të thesarit që do të vijë nga shitja e Osimhen.
Nëse Pioli është i zgjedhuri i De Laurentiis, alternativa e parë e trajnerit të Milanit përfaqësohet nga Vincenzo Italiano i Fiorentinës. Në listën e presidentit të Napolit, i cili për një kohë të gjatë ushqeu edhe ëndrrën e Antonio Contes, është edhe Gian Piero Gasperini.
